Thursday, February 8, 2024

सिनिकल माणसाचं इतिवृत्त

तुम्ही जगता - मौजमजा करता 

मग यथावकाश मरता

तुमच्या जागी दुसर कुणीतरी येत

जग सुरू राहात

काहीही बदलत नाही


काहीही बदलणार नाही

काही बदलण अपेक्षितही नाही


मी माझ्या जगण्यातल एक साध अक्षर देखील बदलणार नाही 

तशी कुणी संधी दिलीच तर


नसता लिहूच शकलो नसतो

इतक्या सगळ्या 

सुखार्थाः सर्वानाम गझला

( किती आहेत अशा ?)


आपण काय आहोत

आपण काय करतो आहोत 

आपण नेमके काय उत्खनतो आहोत

हे प्रश्न निरर्थक आहेत


लहानसहान गोष्टींमधून मौज शोधण 

हीच कदाचित 

जगण्यातली मौज आहे


दुनियेच्या मुळाशी आहे

एका लहानग्याचं

निर्मळ हसू


हेच


कदाचित याहून वेगळ काही नाही


काहीच नाही.

..

अनंत ढवळे



Thursday, February 1, 2024

1

आपल्या आत वाहत असते एक नदी

कधी गोदावरी 

कधी पोटामक


आपण म्हणत असतो या नद्यांचे 

सूक्त

किंवा नुसतेच अनुभवत असतो नदीकाठची शून्यता


(शून्यता ही अनुभवण्याची बाब आहे 

समजण्याची नाही)


आपल्या आधी 

कित्येकांनी अनुभवली असेल ही शून्यता

हे नद्यांचं अथक वाहणं

ही निळाईतली अभेद्य विवरं


आपल्या नंतरही 

अशाच वाहतील या नद्या 

असेच अचल उभे राहतील 

हे उत्तुंग सागरमाथे


अशीच गडदत राहील

देशांच्या काल्पनिक रेषा ओलांडून जाणारी 

एखाद्या पहाडाची विराट सावली*


आपण असतो देशकाल आणि इतिहासावर पडलेल्या 

लहान-सहान वळकट्या

पण म्हणून क्षणभरही थांबत नाही 


ही रंगबिरंग देखाव्यांची शोभायात्रा.


-


अनंत ढवळे


पोटामक  - Potomac river

सागरमाथा - Mount everest

*के२ (K2) ह्या शिखराची सावली 

देशकाल - Time and space


Wednesday, January 3, 2024

1

 हरेक जण विकतो आहे काही ना काही 

मी ग्राहक बनलेलो आहे प्रत्येकाचा


काय करू मी सांग तुझ्या या चतुराईचे 

मला जिथे कंटाळा माझ्या धूर्तपणाचा


नेहमीच असतो आपण का परिघावरती

नेहमीच बोगस का गमतो वेष जगाचा 


-


अनंत ढवळे

Wednesday, December 20, 2023

जोकरच्या गझल #1

 तुझ्याकडे पाहून कुठे तो हसलेला

जोकरचा उपहास तुला का खुपलेला


मनोमनी आतला चोर आहे खट्टू 

मनातल्या शिक्षेला नाही मुकलेला 


झोपेच्या सोंगात खुमारी चढलेली

उगा उगा झोपेत चेव खुरपटलेला


सभ्य जगाच्या पडद्याआड जरासे बघ

कोण कोण रानटी खोलवर लपलेला


जोकर खेळत होता पोकर निर्भावे

केवळ त्याला अभाव होता कळलेला 


बाईपण बाईला ठावे पूर्णपणे

बाईचा निजभाव कुणा समरसलेला


-



अनंत ढवळे


-



र्न्यूयॉर्कच्या ब्रायंट पार्क भागात फिरताना एका लहानशा दुकानात एक जोकरच पेंटिंग पाहिलं. हे चित्र पाहून काही शेर सुचले . नंतर लक्षात आलं ह्या स्वतंत्र गझला आहेत - जोकरच्या गझल. 


जोकरच्या गझल

 र्न्यूयॉर्कच्या ब्रायंट पार्क भागात फिरताना एका लहानशा दुकानात एक जोकरच पेंटिंग पाहिलं. हे चित्र पाहून काही शेर सुचले . नंतर लक्षात आलं ह्या स्वतंत्र गझला आहेत - जोकरच्या गझल. 


Tuesday, December 5, 2023

आणखी एक डिसेंबर पोस्ट

 हा ब्लॉग सुरू करून तब्बल सोळा वर्षं झालीयेत. कवितेची वही हे साधारण स्वरूप ठेऊन चालवलेल हे व्यासपीठ  गझल कविता वाचणाऱ्या (मोजक्याच का असेना) अनामिक वाचकांमुळेच सुरु ठेवता आल आहे हे ही खरच.

Thursday, November 30, 2023

1

मी का प्यालो हे मलाच ठाउक नाही 

ही वेला बहुधा तुटलेल्या ताऱ्याची


पाहत बसलो तर थिजून गेली दिठ्ठी

ही बाव एवढी खोल थंड जन्माची


गंतव्य हालते आणि दुरावत जाते

वाटली उगाचच वेळ दुवे जुळण्याची


आतले पुन्हा वैषम्य दाटले फारा

रद्दी चाळत बसलेलो भरकटण्याची 


माझ्यावर येवुन थांबत जाते आहे

गणना गिनती मोजणी लुप्त शब्दाची



अनंत ढवळे

सिनिकल माणसाचं इतिवृत्त

तुम्ही जगता - मौजमजा करता  मग यथावकाश मरता तुमच्या जागी दुसर कुणीतरी येत जग सुरू राहात काहीही बदलत नाही काहीही बदलणार नाही काही बदलण अपेक्षि...