खिन्न शेते ....

पिके वाळलेली ,उभी खिन्न शेते
स्मशानाहुनी भासती खिन्न शेते

कितीदातरी सांडले रक्त आम्ही
कितीदातरी वाळली खिन्न शेते

कडूनिंब बांधावरी अश्रु ढाळे
कशाने अशी जाहली खिन्न शेते

असे मुक्तता आत्महत्याच ज्याची
धन्याची चिता पाहती खिन्न शेते

नवे हात आलेत राबावयाला
पुन्हा जोगवा मागती खिन्न शेते...

अनंत ढवळे
98230 89674 / anantdhavale@gmail.com

निरंतर खिन्नतेची रात्र होती
उभी डोळ्यात काळी रात्र होती

अशा नात्यास कुठले नाव द्यावे
तुझ्या माझ्यात ढळती रात्र होती

कथा माझ्या तुझ्या संपून गेल्या
कधी ना संपणारी रात्र होती....

फरक हा दॄष्टीकोनाचा असावा
जो दिवस माझी रात्र होती...

अनंत ढवळे
संपर्क :९८२३० ८९६७४

कसा तुझ्या ओंजळीत गेला
दिवा समुद्रात सोडलेला

कुठे दिसेनाच स्वच्छ पाणी
जिथे तिथे गाळ साचलेला..

अशा उदासीन मध्यरात्री
घरापुढे कोण थांबलेला..

नवीन वाटांवरी निघालो,
धरून हाती परंपरेला ...

अनंत ढवळे
संपर्क :९८२३० ८९६७४

marathi gazals

आई जेंव्हा जाता जाता रडली होती
काही पाने वार्‍यावर थरथरली होती

पुढ्यात होता आयुष्याचा उजाड वाडा
माझी छाया खिन्न मनाने बसली होती

वर्षांमागुन वर्षे विचार करतो आहे
चूक कुणाची , कशी कुठे ती घडली होती

अवती भवती जंगल होते नात्यांचे पण
जगण्यासाठी एक डहाळी पुरली होती

कुणीच नव्हते आले निरोप देण्यासाठी
माझ्यामागे धूळ जराशी उडली होती....
अनंत ढवळे..

7.
निवारा जन्मभर देऊन गेली
चुकुन रस्त्यात झाडे गवसलेली

कुठे नेतील या वाटा मनाला
तुझ्या डोळ्यात शून्ये उमटलेली

पिवळसर तावदानांवर वयाच्या
थिजुन बसलीत वर्षे ...निसटलेली

कुणाचे स्वप्न प्रत्यक्षात आले
पहाडांवर उन्हे बघ उतरलेली

तुझी सय ठेवतिल ताजी तवानी
तुझ्या पश्चात राने बहरलेली...
अनंत ढवळे..

8.एक प्रार्थना ओठांमधुनी निघत राहिली
काल रात्रभर तुझी वेदना जळत राहिली

कळूनही त्या सरोवराचे गूढ न कळले
प्रतिबिंबांची वलये नुसती हलत राहिली

जुन्या ऋतूंची साद घेउनी पाउस आला
गेली वर्षे नभातुनी मग गळत राहिली

कुणा न दिसली मूक अरण्यातली पानगळ
त्या दु:खाची गाज दूरवर घुमत राहिली

फुटत राहिल्या आयुष्याच्या बिलोर काचा
दिवस मास वर्षांची शकले पडत राहिली.........

अनंत ढवळे..

(all gazals are protected by cpopyright
cpyright hold by anant s. dhavale
any re print wthout prior permission would be subject to leagal action...)


या गझला http://www.sureshbhat/. in याठिकाणी देखीलप्रकाशित झाल्या आहेत ..
मराठी गझलेसंबधी विविध चर्चा , लेख आणि नवीन गझला वाचण्यासाठी अवश्य भेट द्या http://www.sureshbhat.in/ !!
.

पेटली ह्रदयात होळी आजही
घेरुनी आली उदासी आजही

कोणत्या जन्मातला संबंध हा
बांधला जातो तुझ्याशी आजही

मी कितीसा वागलो तेंव्हा खरे
चाचणी घेतो मनाची आजही

जन्मलो होतो इथे केंव्हातरी
चालली आहे भ्रमंती आजही

आजही बघतात स्वप्ने तारका
रंगते हातात मेंदी आजही.....
(स्वर यमक)
अनंत ढवळे ( cont.09823089674/ anant307@yahoo.com)


2...

मनाची आग कोठे शांतवावी
कुठे जाऊन चादर अंथरावी

फरक ना आमच्यामध्ये जरासा
कशी मी जात त्याची ओळखावी

मनाचे मोल ना काहीच येथे
कुणाला आपली भाषा कळावी

शहर परके , न कोणी ओळखीचे
कुठे ही रात्र आता घालवावी

मिळो संवेदनेचे दान तुजला
तुला ही वाट माझी सापडावी.........

अनंत ढवळे (cont 09823089674 , anant307@yahoo.com)


3.......
काठ डोळ्यांचे भिजावे सारखे
वाटते आहे रडावे सारखे

मी विचारावे तुला काहीतरी
आणि तू नाही म्हणावे सारखे

काय या गावात होते आपले ?
पाय का मागे वळावे सारखे

वाटते पाऊस यावा एवढा
रंग भिंतींचे उडावे सारखे

वाहुनी जावे उभे आकाश हे
दु:ख मेघांचे झरावे सारखे.....


अनंत ढवळे ( cont. 9823089674 anant307@yahoo.com )

4.....

एक औदासिन्य मागे राहिले
शेवटी हे शुन्य मागे राहिले

पांगले सर्वत्र निष्ठांचे धनी
आपले सौजन्य मागे राहिले


वाहुनी गेली किती संवत्सरे
केवढे मालिन्य मागे राहिले

संपले सौहार्द्र संबंधातले
कोरडे पर्जन्य मागे राहिले

घेउनी जा मृत्तिकेचा गंध या
राहू दे जे अन्य मागे राहिले

अनंत ढवळे


5.........


मागणे संपले मागताना तुला
पोचलो मी कुठे शोधताना तुला

दु:ख आकाश भेदून गेले पुढे
आज मी पाहिले भंगताना तुला

धर्म हा कोणता ,कोणता पंथ हा
लोक किंचाळती पूजताना तुला

ही कहाणी तुझी ,कल्पना ही तुझी
लाज का वाटते वाचताना तुला ?

गोपुरे कंपली , पांगली पाखरे
विश्व भांबावले पाहताना तुला.....


अनंत ढवळे ( cont 09823089674 anant307@yahoo.com)