समकालीन गझल

'समकालीन गझल' ह्या अनियतकालिकाचा पहिला अंक प्रकाशित झाला आहे. 'समकालीन गझल' ह्या फेसबुक समूहात तो बघता येईल. वाचा, चर्चा करा, टीका करा. स्प्रेड द वर्ड !

#samakaaleengazal#

गझल

रात्र, तुझ्या डोळ्यांची जादू
गोष्ट चालली आहे लांबत


किती दूर आलेलो आपण
रमत- गमत वाटा धुंडाळत


रंग रूप उतरून चालले
ओळख जाते आहे हरवत


कसे तुझ्याशी संवादावे
तिथवर काही नाही पोचत


काय काय पडलेले मागे
उगाच बसलो आहे मोजत...

--
अनंत ढवळे

(ह्या गझलेत मतला नाही)

एक शेर

परिचीत कुणी भेटेल शक्यताही नाही
हे गाव नव्या शतकात नागरी झालेले

अनंत ढवळे

चार शेर

मी म्हणतो मी ह्या काळाची सूक्ते लिहितो
खरे पाहता काळच माझी कवने लिहितो

पदोपदी हे का वाटत जाते जगताना
कुणीतरी भलताच आपले जगणे लिहितो

सुसंगती जगण्यातच जर उरलेली नाही
काय वावगे करतो जर बेढंगे लिहितो

रक्तामधला जोर देत असतो या धडका
जे झालेले नाही ते झालेले लिहितो

अनंत ढवळे

दहशत

रस्त्यारस्त्यांतून
कानाकोपर्‍यांतून

चकचकीत ऑफिसांतून
शाळाकॉलेजांमधून

भरगच्च गर्दीच्या
बसट्रेनलिफ्टमधून

घराच्या चार भिंतीतून
ओळखीच्यांतून
नातलगांतून
शिक्षकबॉसभाऊदिरांतून

बलात्काराची दहशत घोंघावत येते आहे
कुठूनकुठून
कुणाकुणातून ..

--
अनंत ढवळे

1

कडेकपारीत राहणारे लोक
काय विचार करत असतील
गंमत म्हणून डोंगर चढणारी
डिझायनर माणसं पाहून?

--

अनंत ढवळे