पुन्हा एकदा

एक प्रार्थना ओठांमधुनी निघत राहिली 

काल रात्रभर तुझी वेदना जळत राहिली

कळूनही त्या सरोवराचे गूढ न कळले
प्रतिबिंबांची वलये नुसती हलत राहिली

जुन्या ऋतूंची साद घेउनी पाउस आला
गेली वर्षे नभातुनी मग गळत राहिली

कुणा न दिसली मूक अरण्यातली पानगळ
त्या दु:खाची गाज दूरवर घुमत राहिली

फुटत राहिल्या आयुष्याच्या बिलोर काचा
दिवस मास वर्षांची शकले पडत राहिली

--

अनंत ढवळे..

A haiku

 i'll bet you would know

autumn has not arrived yet

a mere passage through

-

Anant Dhavale

१

 तुझ्या जाळ्यामध्ये अलगद उतरणारा  

मला मी वाटलो खड्ड्यात पडणारा 

पुन्हा भेदात नाही भेद कुठलाही 

तसा हा आणि तो एकच खुरडणारा

सुगम आहे पहाटेच्या दवाइतका  

तुझ्या हसण्यातला आनंद खुलणारा 

नितळ आहेत ह्या पाण्यातले मासे

उगा गळ टाकतो टाकून बसणारा

सभोती धूळ गर्दी धावती वर्दळ

उभा निरलस तरी प्राजक्त खुलणारा

—

अनंत ढवळे