एक शेर

थेंबाचा समुद्र होण्याचे काय बखान
आरपार पसरून राहिलेला विस्तार

॰*
अनंत ढवळे 

चर्चा

मागे स्नेहसदनात समकालीन गझल या अनौपचारिक व्यासपीठांतर्गत गझल वाचन आणि चर्चेचा एक काऱ्यक्रम आयोजित केला होता. मी तिथे वाचलेल्या प्रबंधाची ही चित्रफीत :

https://www.youtube.com/watch?v=uJHdhubEWUQ

गझल

एक साधी सोपी गझल :

एकही गोष्ट आवडेनाशी 

एकही ओढ ओढवेनाशी 

काय आहे तुझ्या मनी जाणे 

बाब साधीच उलगडेनाशी 

प्रेम नाही वियोगही नाही 

आजची रात्र काढवेनाशी 

आपली शांत शांत ही भाषा 

क्रुद्ध काळास मानवेनाशी 

शोधतो अडगळीत केंव्हाचा 

आपली खूण आढळेनाशी...

अनंत ढवळे 

औरंगाबाद

औरंगाबाद
***
मी लौकिकार्थाने शिकलो नाही विद्यापीठात
पण अनेक दिवस घालवले आहेत
तिथल्या गर्द झाडांच्या सावलीत
बेगमपुऱ्याच्या काठावर इतिहास भक्कम
पाय रोवून उभा आहे;
मी त्याला अनेकदा जवळून पाहिलं आहे
गोगापीर आणि हनुमान टेकडीच्या उंचावरून

त्या दिवसांमध्ये मी
बहुतेक पूर्ण करीत होतो
अर्धवट सूटून गेलेल्या लेण्या
किंवा शोधत होतो
सिराजची एखादी हरवलेली गझल;या
शहराला जोडले गेलेत
कितीतरी संदर्भ आणि
अन्वय
शतकाच्या उंबरठ्यावर उभे बशर नवाझ
कधीमधी रस्त्यात भटकताना भेटणारे
तुळशी परब;
बावन्न पुरे
आणि छप्पन दरवाजे

पुढे नेमाड्यांनी हिंदूमध्ये उभं केलं
हे शहर
तेंव्हा वाटलं ही कविता लिहायला
जरा उशीरच होवून गेलेला आहे..
--
अनंत ढवळे