खिन्न शेते ....

पिके वाळलेली ,उभी खिन्न शेते
स्मशानाहुनी भासती खिन्न शेते

कितीदातरी सांडले रक्त आम्ही
कितीदातरी वाळली खिन्न शेते

कडूनिंब बांधावरी अश्रु ढाळे
कशाने अशी जाहली खिन्न शेते

असे मुक्तता आत्महत्याच ज्याची
धन्याची चिता पाहती खिन्न शेते

नवे हात आलेत राबावयाला
पुन्हा जोगवा मागती खिन्न शेते...

अनंत ढवळे

निरंतर खिन्नतेची रात्र होती
उभी डोळ्यात काळी रात्र होती


अशा नात्यास कुठले नाव द्यावे
तुझ्या माझ्यात ढळती रात्र होती


कथा माझ्या तुझ्या संपून गेल्या
कधी ना संपणारी रात्र होती....


फरक हा दृष्टीकोणांचा असावा
तुझा जो दिवस माझी रात्र होती....



जिथे बघतो तिथे वाटाच वाटा
अजब संभावनेची* रात्र होती


--

अनंत ढवळे

(संभावना - शक्यता )

कसा तुझ्या ओंजळीत गेला
दिवा समुद्रात सोडलेला

कुठे दिसेनाच स्वच्छ पाणी
जिथे तिथे गाळ साचलेला..

अशा उदासीन मध्यरात्री
घरापुढे कोण थांबलेला..

नवीन वाटांवरी निघालो,
धरून हाती परंपरेला ...

अनंत ढवळे

('मूक  अरण्यातली पानगळ' ह्या गझल संग्रहातून)