१.
आधी येते
जीवनयापन
नंतर येते भाषा
मग खूप नंतर कधीतरी
संघटित धर्म
२.
भाषा धर्माहून जुनी आहे
म्हणजे
आपले धर्माधारित भाषाभिनिवेश देखील
नवेच आहेत.
३.
भाषा म्हणजेच जाणीव
किंवा चेतना
किंवा चेतनेचा
दस्तऐवज
असे गृहित धरणे
ठीकच आहे
भाषेला धरून
तुम्ही पोचू शकता
थेट ज्ञात उगमापर्यंत.
४.
इतिहास लिहून घेतला जातो
मिथके बनत जातात
एरवी ही गुंतागुंत ना सोडवणारी
पण दोन्हींचे पुरावे सापडतात
भाषेच्या धूळ भरल्या
दप्तरांतून.
5.
प्रत्येक माणूस बनवत जातो
आपापली भाषा
आधीचे घेऊन
काही नवे जोडून
पण मुख्यत: बरेचसे त्यागून
एका अर्थी प्रत्येकातच दडलेला असतो
वेरूळचे लेणे खोदणारा
अनाम मूर्तिकार.
.अनंत ढवळे
No comments:
Post a Comment