मराठी गझल आणि कविता

Saturday, February 18, 2017

भाषेची चौकट

गेले काही दिवस विरचनेबद्दल ( Deconstruction )विचार करतो आहे. शब्दांचे रूढ अर्थ , त्या शब्दांमधून वहन होणारे संदेश आणि एकूण भाषेच्या चौकटीचे अर्थवाहित्व किंवा निरर्थकता असे काहीसे मुद्दे आहेत. Deconstruction ला मराठीत विरचना अथवा विखंडन असे म्हणणे योग्य ठरेल. डिकंस्ट्र्क्शनिजम असा शब्द वापरात नाही- त्यामुळे ह्या संज्ञेत ‘वाद' जोडणे योग्य ठरणार नाही

Thursday, February 16, 2017

Deconstruction / विरचना

भाषेच्या चौकटीच्या बाहेर जाऊन गोष्टी बघणे शक्यनसते, आणि शब्दांना कुठलेही निर्विवाद किंवा निखळ अर्थ नसतात. त्यामुळे बोलली गेलेली प्र त्येकच गोष्ट दुर्बोध आहे - किंवा वृथा बोधक आहे असे म्हणता येते.

Wednesday, February 15, 2017

मनोगत

कपडे खुंटीवर काढून ठेवलेले कधीचे
दारात बूट
घर संयमी म्हाताऱ्यासारखे
एकटक बघत बसलेले
वारा पडलेला
बाहेरची झाडे कमालीची निश्चल
वर अथाह निळेपण
आतल्या केशरी गडद अंधाराशी
वैर घेवून बसलेले

एवढा उशीर झालेला असताना
कुणाला फोन करावा
की निद्रीस्त असतील बहुतेक लोक
सुखासीन
निश्चींततेच्या भोवऱ्यात

ह्या अशा सुनसान रात्रींमध्ये
जिथे सापडत नाही
कुठलाही दुवा
ताडून बघण्यासाठी

आणि दुरावून
मनोज्ञ होऊन बसलेली असतात
आपलीच संथ मनोगते
दुरात हरवलेली एखादी लय शोधीत फिरणाऱ्या फकीरासाखी

अनंत ढवळे

Saturday, February 4, 2017

आभार

गेल्या महिन्याभरात ब्लॉगवर चार हजारांहून पेज बघितल्याच्या नोंदी झाल्यात भेट देणार्‍या सर्व वाचकांचे आभार..

There have been more than four thousand hits on this blog through the last month. A big thank you to all readers !

Monday, January 9, 2017

मिडनाईट सोनाटा

अर्ध्यात अडकलेल्या कथानकासारखे
हरवलेले लोक
कसल्याशा नशेत भरकटलेले

बेकार आडनिड गल्लीबोळ
धुकट थंड दिवस
डिसेंबरच्या शेवटाची
चिन्हे साकळून आलेली

आपण असतो फक्त बघे
दुरून पाहून
समजेपुरता अर्थ लावणारे

मोडकळलेली उपनगरे
लोखंडी जाळ्यांमधून
बघत असणारी
माणसांचे
संघर्ष

रात्र, सायरनच्या आवाजात
दमून भागून झोपलेली
हॉस्पीटलं,
पिवळ्या लाईटींच्या
संभ्रमात बुडालेली

एखाद-दुसरा
चुकार
साक्षीदार
उगाच बसून असलेला
मध्यरात्रीनंतर
व्हिएतनमीज सूप
पाजणार्‍या
हॉटेलात

लांबरुंद रस्ते
रटाळ गोष्टींप्रमाणे
निरिच्छ
चालत जाणारे...

__

अनंत ढवळे

Sunday, December 11, 2016

पहाटेचे हायकू

++

पहाटेची नीरवता
तांबडं फुटण्याची
आसमंती वेळ

++

दूरवर काही खूडबूड
सुरू होते आहे
दिवसाची लगबग

++

ह्या नंतर सूरू होतील
कितीतरी गोष्टी
दिवसासोबत कलंडत जातील

--

अनंत ढवळे

डब्लीन (ओहायो)

http://marathihaiku.blogspot.com/

Sunday, November 13, 2016

कादंबरी - 'बेरंग'

सध्या एक कादंबरी लिहितो आहे. पहिला भाग ऐसीअक्षरेच्या दिवाळी अंकात छापून आला आहे, त्याची ही लिंक :

http://aisiakshare.com/node/5587