बोल

बोल
....
अंधारा दिवस
आभाळ झाकळे
मनावर चढे
जशी ओल

येथून तिथे हा
चालला कारवां
आपल्या सोबत
थंड वारा

दिसू म्हणे वाट
धूके दिसू नेदी
अजब झगडा
चाललेला

म्हणू म्हणे बोल
म्हणू दे न कोणी
बोल बसलेला
गोंधळून

इथे तिथे घुमे
आपला आवाज
ऐकू ये न काही
दूर दूर

बाहेर पडले
आतले संदेह
आकाशाला गेले
लगबग

चल वाहू शब्दे
आपले कथन
भरो येई जन्म
भरू दे बा...

अनंत ढवळे

गझल

ठाव घेतो कोण जन्माचा असा
रंग नाही एकही ज्याचा असा

एक आत्मियताच असते शेवटी
काढला मी अर्थ प्रेमाचा असा

ठाव घेतो कोण दु:खाचा असा
रंग नाही एकही ज्याचा असा

आणते वाहून जे भेटेल ते
वाहण्याचा धर्म पाण्याचा असा

आपल्या सोबत वळावी वाटही
हट्ट आहे चालणाऱ्याचा असा

एकदा जे सोडले ते सोडले
खेद करणे व्यर्थ मोहाचा असा

एक आत्मियताच असते शेवटी
काढला मी अर्थ प्रेमाचा असा

---

अनंत ढवळे